اعلان

عبير زوجه طه سليمان تقول طه جاب لي ناس المباحث وهو فتح ليهم باب البيت

عبير زوجه طه سليمان تقول طه جاب لي ناس المباحث وهو فتح ليهم باب البيت
عبير زوجه طه سليمان


عبير أبو شيبة زوجة طه سليمان ترد في قروب على (الفيس بوك) وتكشف سر حديثها للصحف : 


* قبل اي كلام وتبريرات انا فعلاً قلت الكلام القريتوهو، وقصدت اقول الكلام دا قبل البدأية عشان اي زول وقف ضدي عشان بفتكر انا افشيت اسرار بيتي وسمحت للصحافه تتدخل، و شايف انها بالمطلق عيبه ما بتطلع الا من العايب ما يكمل كلامي لاني ما حتناقش من حيث المبدأ و القيم .. و اي زول بعرفني يجي و يقول لو عندو اي تحفظ علي اي حاجه بقولها عشان الناس تفهم الصوره كامله.
* أنا ركبت بوكس المباحث الواقف في شمبات شارع السوق ومشيت القسم مظلومه وضعيفه وأنا على ذمة طه بسبب مشكلة بيني وبين أخوهو و قعدت ٤ ساعات عشان ما بعرف زول في بحري يضمني .. واحده من بناتي كانت في يدي و التانيه واقفه مع الناس البتفرجو فيني وانا طالعه من البيت مع ناس المباحث وزوجي بتفرج لحد ما ركبت .. الكلام دا كان يوم ٣٠/٩/٢٠١٥ لو كنت قاصده اشتهر او قاصده افضح كان دقيت الحديد وهو سخن وقبل ما اوصل القسم لميت ذات الصحفيين والصحف، رفع فيني قضية إسقاط حضانه و طاعه يعني لسه ما طلقني ، مشيت جلسات و قضايا و مرمطه و أنا بقول انو (أبو بناتي) مع أنه ما فكر اني (أم بناته) ابداً . 
* بغض النظر عن غلطة منو مش اي زوجين وصلو المرحله دي من الخلافات المفروض انهم يتطلقوا ؟ طه سليمان ما عايز يطلقني ، و بساومني في بناتي قصاد الطلاق، بتو عندها مشكله في عينها وهو ما مهتم ، استناهو؟ لما تموت المشاكل و بتي تعمى؟!! ..
* مهما كان الخلاف ما مفروض يأثر في البنات او مسؤوليته تجاهم ، ما ممكن نفس الشخص البعمل مبادرات انسانيه يكون والد ما شاف بناته من تاريخ المشكله و ماسأل عنهم ،و لا سعى لعلاجهم، و ما ممكن انت تقعد تنتقد في أسلوبي و طريقة طرحي و الجريدة الحامله للخبر وانت نفسك حتتوحش و تثور لو واحد من اطفالك مرض و انت ما قدرت توفر ليهو احسن رعايه و احسن اهتمام( عشان ابوهم عامل ليهم حظر من السفر) !!!! 
* عايزه الوضع النموذجي ، الما عنده علاقه بالمعطيات، انو البنات يفضلو مسؤوليه مشتركه مهما كان او يكون ، أنا كسبت قضية إسقاط الحضانه و لسه بناتي محظورات ، اقعد لحدي متين ساكته عشان الناس تحترمني ؟ ١٠ شهور سُكات ما كفايه؟ اي زول كان عارف بالحصل لي و ما وقف معاي و أنا ساكته ما يقيف ضدي و أنا بتكلم ، الماحاول يقويني و يحل معاي مشاكلي ما يجي يكسر مجاديفي ، و الما أنكر على طه الغياب و عدم المسؤوليه و الإهمال و التمادي ما يجي يقول إني اذنبتّ.
* ايوا أنا عبير القلت الكلام الفي الجرايد و لو طه مظلوم يقول العندو وانا بعتذر، و لو حسه انو غلطان انا بقبل العذر، و في النهايه لا يصح الا الصحيح و الأم عندها مسؤولية تجاه الأطفال ما ممكن تتجاهلها و الاب عنده مسؤوليات تجاه الأطفال لا مشروطه و لا اختياريه ، و الساكت عن الحق شيطان اخرس، و الحكايه ما اني اقبل علي نفسي الاهانه ولا ما اقبلها ، كل الموضوع ما في اي سبب يقعدنا هنا برانا ١٠ شهور عشان والد لا بظهر لا بتطمن و لا بلازم و بعد كلامي دا انا بتمنى ما تتختو في مكاني عشان تعرفوا يعني شنو أنك تعاني الامرين و في كل الاحوال تكون غلطان غلطان. 
* انا ما عندي حل و لا ممكن اضيع بناتي عشان اكون مثاليه بعد ما عرفت يعني شنو إنك تقلع شوكك براك .. مجبره اختكم لا بطله ، و لا تافهه، ولا فارغه ، و لا ممكن اقدر آأذي زول ، و انا ما الكديسه البتاكل اولادها عشان خايفه عليهم ، انا ممكن اوصل ابعد الحدود عشان احافظ على بناتي و على حقوقهم و اعلمهم ما يرضو الذله و يقيفو متى ما حسو بالخيانه و الخذلان..
عايزه اتطلق و أسافر لي أهلي و بناتي في يدي ، و دا حقي الشرعي و القانوني و الله علي ما أقول شهيد.
عبير عبدالرحمن أبو شيبة 
زوجة طه سلمان( الى الان و للاسف)
اعلان هنا بأرخص الاس

9 التعليقات :

  1. ربنا يصلح حالكم اخت عبير استاذ طه سليمان فنان محترم وكلنا بنحبه ونحترمة اتمني يكون حليم ويحتوي مشكلته ويكون قدر المسؤولية. ربنا يصلح الحال بينكم وربي بناته في حضن امهم وعز ابوهم وحضنه

    ردحذف
  2. للاسف كنت معجب بي طه شديد

    ردحذف
  3. الواحده تجيب الشقي لي روخا وتقعد تتبكي بعدين انتي الاخترتيه عشان معجب بيه ف فنو امكن او مالو احتمال وانا متأكد بنسبة 200% لو كنتي اخترتيه ع المنظار الشرعي ذا خلق ودين م كان حصل الحصل بس كويس اعتبر وابقي عظه لي غيرك .
    وربنا يصلح حالكم ويحفظ ليك بناتك

    ردحذف
  4. نسال الله ان ينصلح حالكم والاخ طه ربي بناتك في حضنك افضل ليك من اي شي في الدنيا وربنا اداك نعمه حافظ عليها

    ردحذف
  5. أصلو دا حال الفنانين السودانين الواحد لو ماطلق مرتو ما برتاح وخاصة الشباب واي زول متابع بيوت الفنانين الشباب بعرف كدا لكن اعتقد انو القصة دي ناقصة فصول كتيرة عشان نحكم علي طه ولا عبير انو منو الغلطان علي اي حال ربنا يديم المعوروف ويصلح الحال.؟

    ردحذف
  6. زول يضمنك في بحري!! الضمان دا افتكر لي حالات البلاغات و كدا!؟ القصة مبهمة و مبعثرة،، رتبي افكارك و راجعي الحصل و اكتبيو تاني عشان بس نتابع البحصل لانو مافي شي ممكن نعملو غير كدا،،

    و ربنا يصلح الحال

    ردحذف
  7. طه .. انت الراجل المسؤول امام الله من رعيتك قبل م تسأل من زوجتك وشعبك.. اتق الله فيهم ..
    انا اتصدمت صراحه منك مع اني لسى م مصدقه انك انت تعمل كدا

    ردحذف
  8. طه .. انت الراجل المسؤول امام الله من رعيتك قبل م تسأل من زوجتك وشعبك.. اتق الله فيهم ..
    انا اتصدمت صراحه منك مع اني لسى م مصدقه انك انت تعمل كدا

    ردحذف
  9. للبيوت أسرار ..
    ربنا يصلح حال الجميع
    * نصيحة :
    ناجي من لا تخفي عليه خافية في الأرض ولا في السماء فهو القادر علي إصلاح حالك وليس المجتمع والصحافة الساعية لكشف سترك

    ردحذف

عربي باي